ME HET E SAISONKARTE
D Saisonkarte als Sälbschtverständligkeit, als Bekenntnis zum Club, als Statussymbol, als Identifikation und nid z letscht au als Erinnerig – an Sunneschiin und Rääge. Dr Wärt vom kleine Kärtli im Portemonnaie isch witus grösser, als dass es «numme» e Plastikkärtli isch.
Das schiint dr Clubleitig nid ganz bewusst. FCB-Fans, wo zum erschte Mol e Saisonkarte kaufe, kriege die für die kommendi Saison nur geege e Uffpris vo 5.- Frangge physisch. Ab em näggschte Joor söll dr Uffpris für s physische Kärtli alli FCB-Fans beträffe. Drbi gohts nid um dr finanzielli Wärt vo 5.- Frangge, sondern eimol mee ums fählende Bewusstsii und die fählendi Wärtschätzig geegenüber de treuschte Fans. Dass me dä Schritt noch sonere Saison goht, isch erscht rächt blanke Hohn.
Mir wänn dr Saisonkarteverkauf aber nid usbrämse – im Geegeteil, mir wänn dr Verkauf stärgge:
Mir riefe alli FCB-Fans drzue uff, sich die physischi Saisonkarte z hole!
Mit em Vorwiise vo dr physische Saisonkarte gits bi uns e neus Trikot für die warme Summerdääg! S Saisonkarte-Trikot kasch rund um d Saisoneröffnig im Saal abhole und drnoo gits es rund um alli Matchdääg. Witeri Infos folge do. Pris: Me git, was me wott! Dr gsamti Erlös goot an s FCB-Museum.
Holet die physischi Saisonkarte, verzellets witer und mir sehn uns am erschte Spiel im Saisonkarte-Trikot – alli zämme!